Borge

Word 'n borg van die Skaakmeesters Akademie!

Aansoek vir borge vir Skaaktoernooie in Kimberley

Die Skaakmeesters Akademie is 'n privaat-organisasie wat sedert Januarie 2006 privaat-afrigting aan belangstellende kinders vanuit Kimberley en omgewing bied.

Hierdie kinders het so goed presteer dat ek besluit het om, nadat hulle in Desember 2006 aan die SA Junior Skaakkampioenskappe in Pretoria deelgeneem het, vir hulle Skaakmeesters Akademie - kleredrag te laat maak. Dit was baie duur, maar met die hulp van privaatborge en bystand van die ouers kon ons dit doen.

Skole in Kimberley en omgewing (Noord-Kaap) het vir die afgelope paar jaar geen daadwerklike pogings aangewend om skaak in hierdie provinsie te bevorder nie. Geen professionele afrigting word tans by skole aangebied nie. Skaak word maar net gespeel vir die kinders wat belangstel.

Aangesien die toekoms van skaak in ons omgewing nie te rooskleurig lyk nie, het die Akademie besluit om toernooie aan te bied waaraan almal kan deelneem en sodoende hul kennis verbreed.

Skaaktoernooie is 'n groot byeenkoms om te reël en die finansiële aspek is baie hoog.

Om 'n georganiseerde, professionele toernooi te organiseer, word die nodige toerusting benodig soos bv.

a. Borde en skaakstukke
b. Skaakhorlosies wat ook tydens 'n toernooi gebruik moet word
c. Maak van medaljes
d. Ontwerp, druk van sertifikate en ander vorms wat tydens toernooi benodig word.
e. Huur van saal, stoele en tafels.
f. Huur van rekenaarspesialis wat die inligting, uitslae ens. tydens 'n toernooi moet bywerk. (Die rekenaarprogram wat hiervoor gebruik word is soortgelyk aan dié wat tydens SA Jnr Skaakkampioenskappe gebruik word)

In hierdie stadium het ek, eienaar/afrigter van die Akademie, al die onkostes met betrekking tot toerusting self gedra en die res sal d.m.v. inskrywingsfooie gedek word.

Die Akademie het sy eie medaljes en sertifikate laat maak en die kinders wat ons toernooie bywoon sal altyd iets ontvang, hetsy hulle wen of verloor. Op ‘n skaaktoernooi verloor jy nooit regtig nie want jy leer uit jou foute.

Die Akademie het reeds al gedurende Augustus en Oktober 2007 ons eerste twee toernooie in Kimberley aangebied. Die toernooie was ‘n groot sukses en spelers van sover as Upington, Kuruman, Strydenburg, Hopetown en Jan Kempdorp het dit bygewoon.

Om kinders se belangstelling in hierdie sport te prikkel en aan te wakker moet daar pryse tydens hierdie toernooie wees. Die volgende instansies het die Akademie nog tydens elke toernooi bygestaan en pryse en/of koopbewyse aan ons geskenk wat ons na afloop van die verrigtinge tydens ‘n gelukigge trekking aan die kinders uitgee het: Incredible Connection, Homenet Eiendomme, Signature Cosmetics and Fragrances in die Sanlam Sentrum, Tekkie Town, Vasco’s Restaurant en HiFi Corporation.

Die Diamond Pavilion Bestuur het die Akademie van die begin af bygestaan deur vir ons gratis vloerspasie in die mall te gee waar ons gedurende ‘n Saterdagoggend op ‘n gereelde basis teen die publiek gaan speel. Ons speel saam met almal, groot, klein, oud en jonk. Alles is gratis. Die koste vir advertensies met betrekking tot hierdie byeenkomste word ook deur die Akademie gedra.

Die bestuur van Wimpy Kimberley het ook vir ons die maak van sleutelhouers gefinansier wat tydens toernooie en ander geleenthede gratis aan kinders uitgedeel word.

Om egter ‘n goeie sterk span teen die einde van die jaar na die SA spele te stuur, moet die kinders baie oefening en blootstelling gedurende die jaar kry. Daarby bedoel ek blootstelling teen ander provinsies se spelers soos bv. Bloemfontein ens. Hulle word ook na hierdie toernooie genooi.

Daar is egter nog ekstras wat ons vir die kinders kan gee wat hulle tydens 'n toernooi benodig, bv.

1. Penne, wat hulle moet gebruik om die skaakrondtes se skuiwe mee to noteer
2. Ek sal graag saam met die medaljes en sertifikate vir die kinders kontant- en/of ander pryse ook wou aanbied. Kontant pryse is baie gewild aangesien dit die kinders motiveer om die toernooie by te woon.
            Die kontantprysgeld word soos volg beplan:
            1ste plek – R200
            2de plek - R150
            3de plek - R50

Daar is ses ouderdomsgroepe, nl. Onder 10-, 12- 14-, 16-, 18- en 20. Derhalwe sal elke ouderdomsgroep R400 prysgeld benodig, en dit bring die totale prysgeld per toernooi op R2400 te staan. In elke ouderdomsgroep sal daar ook 'n beste meisiespeler aangewys word, wat dan net 'n spesiale sertifikaat en goue medalje sal ontvang. Ons glo dat die prysgeld die spelers definitief sal motiveer om harder te speel en ook die belangstelling van ander kinders sal aanwakker om deel te neem in toekomstige skaaktoernooie. Die prysgeld kan egter self deur die betrokke instansie bepaal word, Hierdie is slegs ‘n voorstelling.

Aangesien die Akademie reeds die kostes vir die organisering van die toernooie dra kan dit nie die bovermelde items ook aan die kinders verskaf nie.

‘n Toernooi bestaan gewoondelik uit ‘n minimum van vyf tot nege rondtes van ongeveer twee ure per spel. Dit kan oor twee dae strek, maar as gevolg van die koste daaraan verbonde ,hou ons ons toernooie net op een dag en ons speel vyf rondtes van negentig minute elk. So ‘n toernooi begin vroegoggend en duur tot die aand. Aangesien die kinders se ouers die hele dag by die saal teenwoordig is, beplan ons ook om tydens die toernooie vir volwassenes voorsiening te maak sodat hulle in hul eie groep teen mekaar kan speel. Medaljes sal ook aan hulle uitgereik word en indien ons kontant borge kry kan daar vir hulle pryse aangekoop word. Hulle is net slegs groep en daar sal net ‘n eerste, tweede, derde en beste Damespeler plek wees.

Ons beplan om dit op 'n gereelde basis aan te bied. Ons wil die kinders reg voorberei sodat hulle ook kompeterend aan die jaarlikse SA Junior Skaakkampioenskappe, wat deur CHESSA aangebied word, sal kan gaan deelneem. Ons spelers moet dus toernooi-gereed wees en 'n goeie standaard spel kan speel. Dit kan slegs bereik word deur gereelde oefening en blootstelling aan georganiseerde toernooie. Deelnemers aan toernooie moet 'n redelike kennis van die spel hê aangesien daar geen afrigting m.b.t die spel tydens toernooie sal plaasvind nie.

Die Akademie het reeds werkswinkels by belangstellende skole begin aanbied om die basiese beginsels van skaak aan die kinders oor te dra. So ‘n werkssessie neem gewoonlik ses ure en dit word op aanvraag van die skool gedoen. Die skool is dan verantwoordelik vir die koste daaraan verbonde. Die eerste werksessie is by Laerskool Seodin Kuruman gehou, op aanvraag van die skoolhoof. Hulle was so tevrede met die oefening dat hulle skaak as ‘n periode tydens skoolure ingestel is. Alle skole is egter nie bereid om te betaal vir hierdie werksessies nie daarom kom die nodige opleiding nie uit by die kinders wat werklik belangstel in die spel nie.

Skaak is ‘n baie komplekse sport en kinders wat dit beoefen ontwikkel hul konsentrasie, selfbeeld, dissipline, deursettingsvermoe, redenasievermoë en selfbeheersing. Navorsing het ook bewys dat persone wat skaak beoefen minder vatbaar is vir Alzheimer se siekte wanneer hulle ouer word as dié wat nie skaak gespeel het nie.

Indien u enigsins bereid is om vir die kinders kontantpryse en/of enige ander aard van pryse (items/geskenkbewyse ens.) te borg, kan u my kontak by bogenoemde nommers. Sou u hierdie Akademie op een of ander wyse kan en wil ondersteun vir 2010 sal dit opreg waardeer word.

Die volgende is uitgawes wat in gedagte gehou kan word indien u dit oorweeg om die Akademie te ondersteun:

Huur van tafels en stoele,
Huur van lokaal,
Voorsienning van penne vir die spelers en
Druk van sertifikate en
Maak van fotostate van vorms wat tydens ‘n toernooi deur die spelers gebruik moet word.

U moet in gedagte hou dat daar tussen 60 en 120+ spelers vir so ‘n toernooi kan registreer, afhangende van die belangstelling. Hierdie bogenoemde punte is net ‘n paar waarvoor die Akademie self die onkostes moet bybring.

Die Skaakmeesters Akademie wil graag alles in sy vermoë doen om skaak in hierdie provinsie te bevorder sodat die kinders baat daarby sal vind. Ons het baie planne en nuwe idees om hierdie sport by skole te bemark, maar aangesien ons ‘n privaat organisasie is en die finansies net genoeg om die basiese, dinge soos toernooie ens. te reël, sal die bemarking by skole stadig gaan.

Sou u persoonlik met my oor die aangeleentheid wou gesels, kan u my skakel en ek sal u kom sien.

Alle borge/donateurs kan 'n gratis advertensie-bannier op hierdie webtuiste kry vir 'n sekere tydperk. Ons sal ook alle borge asook die betrokke pryse wat in die toernooi op die spel sal wees, in die skrywes aangaande die toernooie na skole aandui.

U spoedige antwoord in hierdie verband sal waardeer word.

Byvoorbaat dank

Pierre de Smidt
Akademie Eienaar

Borge Kategorieë per toernooi: Kriteria word bereken deur geldwaarde en gereelde diens.  Ons borge word in 3 kategorieë ingedeel, en soos u kan sien, is ons op soek na borge in veral die silwer en brons afdelings.

          Goud:            Skaakmeesters
                               Wimpy
                               Diamond Pavilion Mall
          Silwer:
          Brons:           Big Hole
                               Hancor

Ons bedank die volgende borge van
harte vir hul ondersteuning aan ons: